Alessandro Del Piero e pati thuajse të vështirë të ruante qetësinë e tij pas ndeshjes Fiorentina-Juventus. Ishte e vështirë të komentohej paraqitja e bardhezinjve, të cilët u shkatërruan 3-0 nga formacioni Viola me një performancë shumë negative. Ish-kapiteni dhe aktualisht opinionist për “Zonjën e Vjetër” nuk e fshehu zhgënjimin në analizën e tij të parë, duke ndarë përgjegjësitë mes skuadrës, trajnerit dhe drejtuesve, ndërsa njohu edhe meritën e një Fiorentine të shkëlqyer.
Del Piero dukej thuajse i sikletosur para mikrofonave të Sky, teksa komentonte paraqitjen e ish-skuadrës së tij. Për këtë arsye, ai ndjeu nevojën të bënte një hyrje sqaruese: “Është e vështirë, natyrisht, për dikë të përfshirë si unë, edhe pse përpiqem të jem gjithmonë shumë transparent dhe objektiv në atë që shoh, të komentosh një moment të tillë. Momente të tilla kanë ndodhur edhe në të kaluarën dhe i kam përjetuar edhe vetë, sezone që thjesht shkojnë keq”.
Po kush është përgjegjës?
Para se të analizonte trajnerin, drejtuesit dhe lojtarët, Del Piero foli për “shpirtin e Juves”, i cili nuk u pa në fushë: “Para se të shkojmë te aspektet taktike, pra çfarë mund të bënte trajneri, çfarë bën klubi, apo çfarë bënë lojtarët, gjëja që më ra më shumë në sy – dhe që ndodhi edhe kundër Atalantës – është mungesa e reagimit. Ky është një sinjal shumë i rëndë. Kur nuk reagon ndaj goditjeve të kundërshtarit, do të thotë se je në një pikë shumë, shumë të ulët. Kjo nuk përfaqëson aspak shpirtin e Juventusit, sepse mund të fitosh apo të humbasësh, por gjithmonë me kokën lart”.
Lexo më tej: Juventus pëson 7 gola në dy ndeshje: Giuntoli konfirmon teknikun Thiago Motta
Fajtorët për dështimin e Juventus, sipas Del Piero
Sipas tij, përgjegjësia ndahet mes lojtarëve, drejtuesve dhe trajnerit. Në veçanti, Del Piero u habit nga zëvendësimet e bëra nga Thiago Motta: “Sot, mendoj se asnjë nga lojtarët në fushë, as ata në stol dhe as drejtuesit nuk mund të ndihen të qetë dhe të thonë ‘Ne dhamë gjithçka’. Nuk kishte asnjë reagim në fushë, nuk kishte asnjë reagim në stol, sepse më pas, zëvendësimet ishin tre mbrojtës. Po humbiste 3-0 dhe ndërron tre mbrojtës. Sigurisht që pas kësaj ka arsye, nuk po akuzoj as lojtarët, as Mottën, as klubin, është një çështje më e gjerë, e gjithë ambientit”.
Problemi më i madh: mungesa e reagimit tipik të Juves
Pika më e rëndë sipas ish-kapitenit Del Piero ishte mungesa e reagimit: “Nuk mund të mos reagosh kur po të godasin nga të gjitha anët. Duke hapur një parantezë, Fiorentina ishte e jashtëzakonshme – ata dolën nga vështirësitë me një unitet të ndryshëm. Çdo ekip ka momentet e tij të vështira, por ata u bashkuan rreth trajnerit, me një skuadër të strukturuar si duhet, dhe merita u takon atyre. Në aspektin specifik, shtatë gola të pësuar në dy ndeshje… ka shumë pak për të komentuar”.
