Presidenti ukrainas Volodymyr Zelensky ka njoftuar se ushtria e tij ka testuar me sukses raketën e saj të re të prodhimit vendas, “Long Neptune”, me një rreze veprimi prej 621 milje (1 000 kilometra). Kjo sipas tij do të thotë se raketa e re me rreze të gjatë është e aftë të godasë drejtpërdrejt Moskën.
“Long Neptune” është testuar dhe përdorur me sukses në luftime” – citohet të ketë thënë Zelensky. “Falë ekspertëve tanë ukrainas, prodhuesve dhe ushtrisë ne vazhdojmë të punojmë për të garantuar sigurinë e Ukrainës” – shtoi ai. Sipas mediave vendase, sulmi i së premtes në rafinerinë ruse të naftës “Tuapse” mund të jetë kryer nga kjo raketë e cila është një version i përmirësuar i asaj që fundosi kryqëzorin e Flotës Ruse të Detit të Zi “Moskva” në prill 2022.
“Long Neptune” është zhvilluar në funksion të shkurtimeve të mundshme në furnizimet ushtarake amerikane. Sipas faqes së internetit Militarnyi, ky version i avancuar i raketës R-360 ka një sistem të ri udhëzues, i cili përfshin pozicionimin satelitor për kontroll gjatë fazës së fluturimit. Gama e saj është pothuajse 3 herë më e madhe se modeli bazë, duke arritur deri në 1000 kilometra, me aftësinë për të goditur edhe kryeqytetin rus.
Raketa duket se e ka treguar tashmë efektivitetin e saj, si në rastin e sulmit ndaj rafinerisë ruse në Tuapse. Raketa mund të lëshohet nga tubat e përdorur për R-360, duke siguruar ndërveprueshmëri dhe kursime në kosto. Ukraina synon të prodhojë të paktën 100 mijë armë të drejtuara me rreze të gjatë deri në vitin 2025, duke përfshirë edhe “Long Neptune”. Suksesi i raketës mund të hapë gjithashtu tregje të reja ndërkombëtare, siç tregohet tashmë nga interesi i disa vendeve, përfshirë Rumaninë.
