Pas barazimit me Romën, Napoli nuk ka arritur të fitojë as ndaj Udineses. Në ndeshjen e javës së 24-të të Serie A, ekipi i Conte-s nuk shkoi më shumë se një barazim 1-1 me Udinesen. Bardheklatrit nuk përfituan për të shtuar distancën në krye të tabelës, duke u pozicionuar përkohësisht 4 pikë para Interit.
Në “Maradona”, gjatë pjesës së parë, portierët Meret dhe Sava realizuan disa pritje të jashtëzakonshme. McTominay (37′) shënoi për Napolin me kokë pas një goditje nga këndi. Ndërkohë Ekkelenkamp (40′) barazoi për Udinesen me një goditje të saktë me të djathtën, pas gabimit të Mazzocchi gjatë një pasimi.
Në pjesën e dytë, të dy ekipet luftuan fort për fitoren dhe luajtën me ritëm të lartë. Megjithatë asnjëri prej tyre nuk arriti të shënojë dhe rezultati mbeti 1-1 deri në fund. Napoli, pa Olivera dhe Spinazzola, bëri disa ndryshime taktike. Përdori Mazzocchi në krahun e majtë dhe mbajti Juan Jesus në mbrojtje në vend të Buongiorno, i dëmtuar. Edhe pse pati më shumë zotërim të topit, Napoli pati vështirësi në kalimin e mbrojtjes së fortë të Udineses.
Në fund, pas disa tentativave nga McTominay dhe Lukaku, si dhe përpjekjeve të Udineses në kundërsulm, rezultati mbeti i pandryshuar. Ky barazim ngadalëson ritmin e Napolit në garën për titullin e Serie A.
