Kryetarja e deleguar e Bashkisë Tiranë, Anuela Ristani ka reaguar për një emision televiziv mbrëmjen e sotme, pas zhurmës që u bë orët e fundit në institucionin që ajo drejton.
Ristani në mesazhin e dërguar shprehet se në Bashkinë e Tiranës nuk ka pasur zënka.
Delegimin e Sara Goxhajt në krye të Bashkisë Tiranë, ashtu si shefi i saj dhe Ristani e ka quajtur një keqkuptim.
“Duke ju ndjekur vërej se po përgojohem me të pavërteta që do ishte shumë e lehtë të mësonit se sa të pavërteta janë. Unë nuk jam e besuara e Ramës siç më quajtën aty sepse me kryeministrin nuk kisha komunikuar asnjëherë përpara se të merrja delegimin nga kryetari Veliaj. Dhe në Bashkinë e Tiranës nuk është zënë askush me “gishta në vesh” ndërsa keqkuptimi i krijuar nga pamundësia e komunikimit normal nuk ka asnjë lidhje nga fishekzjarrët mediatikë të ditës së sotme. Do të vlerësojë leximin e mesazhit tim për të korrigjuar sadopak shtrembërimin e emrit tim në publik, Anuela Ristani”, thuhej në mesazhin e lexuar në emisionin “Opinion”.
