Mario Mitaj do të jetë një nga mungesat e mëdha për Shqipërinë në ndeshjet e muajit mars. Mbrojtësi kuqezi ka probleme të vazhdueshme me pubalgjinë, ndaj vendosi që të bëjë ndërhyrje kirurgjikale për t’i dhënë fund shqetësimeve, në mënyrë që të luajë sa më i qetë.
Ndaj futbollisti këto ditë ka udhëtuar drejt Anglisë, por jo për të qenë pjesë e grupit kuqezi që do të përballet në “Wembley” me vendasit. Ai i është nënshtruar ndërhyrjes kirurgjikale në një klinikë në Londër, për të zgjidhur këtë problem që e kishte penalizuar vazhdimisht në sezonin e fundit.
“Çdo gjë shkoi mirë me operacionin. Tani është koha që të shoh për rehabilitim sa më të mirë dhe të kthehem sa më shpejt të jetë e mundur më i fortë se kurrë të ndihmoj ekipin dhe vendin tim”, shkruante ndër të tjera Mitaj, në një foto të publikuar në rrjetet sociale nga vetë mbrojtësi shqiptar pas ndërhyrjes kirurgjikale.
