Bayern Munchen ka bërë një tjetër hap fals në javën e 26-të të Bundesligës. Kundërshtari i Inter në çerekfinalet e Champions League nuk shkoi më shumë se një barazim 1-1 në fushën e Union Berlinit, ku një gabim i rëndë i portierit Urbig në fund të ndeshjes i mohoi fitoren ekipit të drejtuar nga Vincent Kompany. Fillimisht, Bayern kaloi në avantazh me Sané, por një gafë e Urbig i dha mundësinë Hollerbach të barazonte. Ndërkohë, Freiburg i Grifos barazoi 2-2 ndaj Mainz, edhe pse kundërshtari luajti me një lojtar më pak për një pjesë të madhe të ndeshjes. Augsburg mundi 1-0 Wolfsburgun, ndërsa Borussia Mönchengladbach triumfoi 4-2 ndaj Werder Bremen me një paraqitje të shkëlqyer të Plea.
Union Berlin – Bayern Munchen 1-1
Bayern Munchen, kryesuesi i Bundesligës, vizitoi stadiumin “An der Alten Försterei” për t’u përballur me Union Berlin. Pjesa e parë ishte mjaft e ekuilibruar, me bavarezët që dominuan zotërimin e topit, ndërsa vendasit mbroheshin me disiplinë në zonën e tyre. Rastet për gol ishin të pakta, me vetëm Olise që provoi një goditje nga distanca rreth minutës së 30-të. Mundësia më e mirë e pjesës së parë erdhi në minutat shtesë, kur Ronnow bëri një ndërhyrje vendimtare për të mohuar golin e Gnabry, duke mbajtur rezultatin 0-0 në pushim.
Në pjesën e dytë, Kane provoi direkt nga një goditje dënimi në minutën e 50-të, ndërsa Urbig, i cili zëvendësoi Neuerin në portë, pati një moment pasigurie vetëm pak sekonda më vonë. Megjithatë, portieri 20-vjeçar u tregua i vëmendshëm në minutën e 60-të, kur priti një gjuajtje të fortë nga distanca të Juranovic. Në minutën e 63-të, Musiala detyroi një tjetër pritje nga Ronnow, para se Bayern të zhbllokonte rezultatin në minutën e 75-të. Stanisic dërgoi një pasim në qendër të zonës dhe Sané shënoi me një goditje të saktë me të djathtën.
Megjithatë, Union Berlin nuk u dorëzua dhe në minutën e 83-të shfrytëzoi një gabim të rëndë të Urbig. Një pasim i gabuar i portierit i dha mundësinë Hollerbach të shënonte lehtësisht golin e barazimit 1-1, duke ndëshkuar ish-klubin e tij. Ky ishte një tjetër rezultat zhgënjyes për Bayernin, i cili pas humbjes ndaj Bochum, tani merr vetëm një pikë dhe shkon në kuotën e 62 pikëve. Ndërkohë, Bayer Leverkusen mund të ngushtojë diferencën në vetëm 6 pikë, nëse fiton ndaj Stuttgartit. Për Union Berlin, ky barazim është një rezultat i rëndësishëm, që e çon në 27 pikë në renditje.
Mainz – Freiburg 2-2
Në “Mewa Arena” u zhvillua një përballje e rëndësishme për zonën europiane mes Mainz dhe Freiburg të Vincenzo Grifos. Mainz kaloi në avantazh në minutën e 34-të me një aksion të zgjuar nga Burkardt, i cili befasoi mbrojtësin Sildillia dhe përfitoi nga një asist i saktë i Caci për të shënuar golin e 1-0.
Megjithatë, pak para përfundimit të pjesës së parë, Mainz mbeti me një lojtar më pak pasi Kohr u ndëshkua me karton të kuq për një faull si lojtari i fundit. Arbitri fillimisht dha penallti dhe një karton të verdhë, por pas konsultimit me VAR-in e ndryshoi vendimin duke akorduar goditje dënimi dhe karton të kuq.
Freiburg u përpoq të përfitonte menjëherë nga superioriteti numerik dhe rrezikoi me Grifon në minutën e 45-të, por portieri Zentner bëri një pritje vendimtare. Në minutën e 54-t, ai shpëtoi ekipin e tij edhe nga një goditje e Ginter, por nuk mundi të ndalte golin e barazimit të Gregoritsch me kokë në minutën e 58-të.
Freiburg vazhdoi të shtynte për përmbysjen dhe Zentner bëri dy pritje të rëndësishme ndaj Holer në minutën e 60-të. Në momentin më të mirë të miqve, Mainz befasoi duke kaluar sërish në avantazh në minutën e 68-të me një gol me kokë nga Hanche-Olsen pas një krosimi të Caci. Megjithatë, Freiburg nuk u dorëzua dhe Kubler vendosi shifrat në 2-2 pas një aksioni të bukur të Doan. Ky rezultat e çon Mainz në 45 pikë dhe Freiburg në 42.
Augsburg – Wolfsburg 1-0
Augsburg priti Wolfsburg në “WWK Arena” dhe krijoi rastin e parë të rrezikshëm në minutën e 30-të, kur Rexhbecaj provoi me një goditje të afërt, por portieri Grabara e ndali. Pjesa e parë u mbyll pa gola, por Augsburg kaloi në avantazh në minutën e 54-të, kur Tietz përfitoi nga një gabim i mbrojtësit Vavro dhe realizoi pas një topi të gjatë nga Giannoulis.
Lexo më tej: Champions, Dortmund përmbys Lille e fluturon në çerekfinale: i pret Barcelona
Rexhbecaj rrezikoi sërish në minutën e 70-të, ndërsa Wimmer goditi shtyllën në minutën e 85-të. Në fund, Augsburg mori një fitore të rëndësishme 1-0, duke barazuar Wolfsburgun në 38 pikë.
Werder Bremen – Borussia Mönchengladbach 2-4
Werder Bremen dhe Borussia Mönchengladbach u përballën në “Weserstadion”, ku miqtë kaluan shpejt në avantazh. Në minutën e 8-të, Veljkovic shkaktoi penallti dhe Plea e ktheu në gol për 1-0. Werder reagoi duke goditur traversën me Jung në minutën e 15-të, por në të 28-tën, Plea shënoi edhe golin e dytë me një gjuajtje të fortë.
Schmid ngushtoi shifrat në minutën e 39-të me një goditje dënimi të shkëlqyer, ndërsa Andre Silva barazoi në 2-2 me një penallti në minutën e 45+3. Balanca u prish menjëherë në fillim të pjesës së dytë, kur Plea realizoi “hat-trick” në minutën e 48-të. Werder provoi të reagonte duke goditur një traversë me Stage në minutën e 62-të, por në të 81-tën, Kleindienst vulosi fitoren 4-2 për Gladbach pas një asisti nga Plea. Autori i golit të katërt u ndëshkua me karton të kuq në fund, por kjo nuk e pengoi Gladbach të ngjitej në 40 pikë, ndërsa Werder mbeti në 33.
