Kreu i Partisë Demokratike, Sali Berisha hedh poshtë pretendimet se ka shpërblyer besnikët duke i vendosur në lista të mbyllura për kandidatë, për zgjedhjet e 11 majit.
Në një konferencë me gazetarët këtë të premte, kreu i PD tha se ata kanë të drejtë të mendojnë ashtu, por nuk është e vërtetë.
Kyredemokrati theksoi se askush nuk është hequr nga listë për shkak të mendimit ndryshe, por sepse tha se “më pëlqen diversiteti”.
“Po të ndalesh si politolog nuk do të gjesh në 34 vite në skenën politike shqiptare një njeri si Sali Berisha që jo vetëm e pranon, por e parapëlqen diversitetin dhe këtë ta them me bindjen më të thellë. Asnjë njeri nuk është hequr dhe nuk mund të hiqet se Sali Berisha nuk mund ta toleronte atë për mendimet e tij ndryshe nga unë. Kurrë, nuk ndodh ajo. Atë që e mendojnë këtë. Ndonjë prej personave që mund të ketë menduar se nuk është në listë për këtë arsye, ka gabuar, nuk mund të mbetet kush. Unë në fund të fundit, këtë jetë politike e kam nisur për motivin më themelor të pranimit të mendimit ndryshe. Kjo ka qenë”, tha Berisha.
“Po të më kthesh në origjinë atje ku kam filluar, për mendimin ndryshe e kam filluar. E kam filluar për mendimin ndryshe, kur ai kushtonte ndonjëherë me çmim shumë të shtrenjtë. Nuk heq dorë unë nga ajo. Nuk më pozicionon mua kush se pse, kundërshton apo kritikon në pozicion që unë të them, se nuk të toleroj. Mund të mendojnë, kjo është normale, por nuk është e vërtetë”, shtoi ai.
Berisha komentoi edhe listën e Elbasanit, që sipas tij, është me kandidatë të shkëlqyer dhe se janë optimist për fitoren në 11 maj.
“Këto zgjedhje janë konceptuar si betejë, fushë beteje. Rrethanat ngushtuese, koalicioni etj., kanë diktuar në këto qëndrime. Unë po vij nga një takim me përfaqësuesit, me deputetët e këtyre zonave. Të garantoj se në sytë e tyre, unë pashë vetëm fitore. Përfaqësues të shkëlqyer, njohës të mirë të qytetarëve, nevojave të terrenit. Pra mund të them se, pas urimeve me qytetarët e Elbasanit, pjesa tjetër e festimeve të Ditës së Verës për mua në Elbasan, kaloi me një mbledhje pune me ata kandidatë të shkëlqyer të Peqinit, Gramshit, Dumresë, Cërrikut, Librazhdit, Përrenjasit. Me kandidaturat e koalicionit”, tha Berisha, i cili më herët gjatë ditës zhvilloi një vizitë në Elbasan.
“Pra pashë aty një ansambël. Nuk mbaj mend ndonjëherë të ketë patur para qytetarëve të atij qarku një ansambël të tillë.
Nga forca natyrale në fushata, tek njëri prej zërave dhe këngëtarëve më të mirë, më virtuoz të Shqipërisë, siç është Armando Kllogjeri, etj. Zonja të nderuara të gatshme për të sakrifikuar në pozicionin që janë emëruar. Pra u largova nga Elbasani me kënaqësi të veçantë nga takimet që para në rrugë me burra e gra fisnikë në këtë ditë feste, por edhe me përfaqësues të tyre që do jenë në parlamentin e Shqipërisë”, shtoi ai.
