Shpresat e Manchester United për të shpëtuar sadopak këtë sezon katastrofik varen nga Europa League. Skuadra e Ruben Amorim u eliminua nga FA Cup të dielën dhe është e destinuar të regjistrojë përfundimin më të keq ndonjëherë në Premier League, duke u renditur në vendin e 14-të. Pavarësisht paraqitjeve të paqëndrueshme, United ka fituar trofe në dy sezonet e fundit nën drejtimin e Erik ten Hag – Kupën e Ligës në 2023 dhe FA Cup në 2024.
Triumfi i famshëm ndaj rivalëve të Manchester City në “Wembley” majin e kaluar u siguroi atyre një vend në Ligën e Evropës, por e vetmja mundësi për të siguruar pjesëmarrjen në garat evropiane sezonin e ardhshëm varet nga fitimi i kompeticionit të dytë më të madh të UEFA-s për klube. Megjithatë, duke parë problemet e tyre të shumta, ky objektiv duket gjithnjë e më i parealizueshëm, ndërsa përballja e tyre në raundin e 1/16-ve me Real Sociedad është e hapur pas barazimit 1-1 në ndeshjen e parë në Spanjë.
United ka një histori të tmerrshme kundër skuadrave të La Ligës dhe është eliminuar nga garat evropiane plot 13 herë nga ekipet spanjolle në këtë shekull.
Mallkimi spanjoll i Manchester United
Është e pabesueshme, por Manchester United është eliminuar në 13 nga 24 sezonet evropiane që nga viti 1999/2000 – duke përfshirë edhe finalet e humbura. “Djajtë e Kuq” kanë humbur tre finale evropiane kundër skuadrave spanjolle: dy herë në finalen e Ligës së Kampionëve kundër Barcelonës në 2009 dhe 2011, si dhe finalen dramatike të Ligës së Evropës ndaj Villarrealit në 2021, ku humbën me penallti. United gjithashtu humbi Superkupën e UEFA-s ndaj Real Madridit në 2017, por kjo përballje nuk është përfshirë në këtë statistikë.
Siç ilustron grafiku përkatës, United ka fituar vetëm 17 nga 57 ndeshjet kundër skuadrave spanjolle që nga viti 2000, me një mesatare prej 1.25 pikësh për ndeshje. Diferenca e golave të United në këto përballje është -1, ndërsa skuadra ka pësuar eliminime të shumta me rezultat të përgjithshëm në dy ndeshje.
Lexo më tej: Manchester United, lamtumirë Old Trafford: stadiumi i ri me 100,000 vende
Ajo që është edhe më shqetësuese për United është fakti se nuk ka vuajtur vetëm kundër “treshes së madhe” të La Ligës (Real Madrid, Barcelona, Atlético Madrid), por edhe ndaj skuadrave më modeste. Sevilla i ka eliminuar nga Evropa tre herë, ndërsa Athletic Club dhe Deportivo La Coruña gjithashtu kanë shkaktuar eliminimin e “Djajve të Kuq”. Për më tepër, United nuk ka arritur të fitojë asnjë ndeshje kundër tre klubeve të caktuara spanjolle.
Si shihet situata nga Spanja?
Duke folur për vështirësitë e Manchester United kundër ekipeve spanjolle, Iván Turmo – eksperti i La Ligës në Transfermarkt – tha: “Gjiganti anglez është një nga kundërshtarët e preferuar të skuadrave spanjolle në garat evropiane dhe ka qenë një tjetër viktimë e dominimit të futbollit iberik, i cili nuk ka humbur asnjë finale të madhe ndërkombëtare që nga maji i vitit 2001. Përballja e fundit e United me një skuadër të La Ligës përfundoi me një tjetër eliminim në çerekfinalet e Ligës së Evropës kundër Sevillas, e cila më pas fitoi turneun në sezonin 2022/23. Një sezon më parë, ata u eliminuan nga Atlético Madrid në fazën e 1/8-ve të Ligës së Kampionëve.”
Rekordi kundër klubeve spanjolle
“Episodet më të rëndësishme të mallkimit spanjoll të Manchester United përfshijnë humbjet në tri finale: dy në Ligën e Kampionëve kundër Barcelonës dhe finalen dramatike të Ligës së Evropës kundër Villarrealit, ku ‘Nëndetësja e Verdhë’ fitoi me penallti pas gabimit të David de Geas – i cili nuk arriti të priste asnjë gjuajtje nga pika e bardhë.”
