Një diplomat rus, i tërhequr nga Brukseli mes një spastrimi të spiunëve nga autoritetet belge, është nominuar për të drejtuar misionin në Beograd të organit më të madh të sigurisë në Evropë, sipas një hetimi të përbashkët të Radios Evropa e Lirë dhe disa mediave evropiane.
Kandidatura e tij u bë mes akuzave në rritje nga Shtetet e Bashkuara dhe qeveritë evropianevitet e fundit për aktivitete “të dëmshme” ruse në rajonin e mbuluar nga organizata rajonale e sigurisë me 57 shtete, me seli në Vjenë.
Një burim nga institucionet e inteligjencës e quajti këtë tërheqje të spiunëve si një “rast për të zbrazur sirtarin tonë” pas pushtimit të plotë të Ukrainës nga Rusia në shkurt të vitit 2022.
Diplomatët rusë, të cilët nuk janë identifikuar publikisht deri më tani, ishin të lidhur në listë me Shërbimin e Inteligjencës së Jashtme të Rusisë (SVR) ose drejtorinë e saj të inteligjencës ushtarake, të njohur si GRU.
Tani, Moska po përpiqet ta rikthejë Iordanidin në OSBE, organizatën shumëpalëshe me bazë në Vjenë që, deri në pushtimin e Ukrainës nga Rusia në vitin 2022, kishte luajtur një rol qendror në monitorimin e agresionit rus në Ukrainë dhe përpjekjet për të ndërmjetësuar mes Moskës dhe Kievit.
“Ne ndjekim një proces të rreptë rekrutimi për të gjitha pozicionet tona në OSBE”, tha Taylor.
Udhëtimet ballkanike
Prania publike e Iordanidit në kryeqytetin belg ishte jo shumë domethënëse, megjithëse duket se ai mbërriti aty në një moment gjatë vitit 2023, në një shkëputje gjeografike nga një karrierë diplomatike e përqendruar kryesisht në Ballkan.
Në maj të vitit 2013, Iordanidi ishte ulur mes presidentit rus, Vladimir Putin, dhe ministrit të Jashtëm, Sergei Lavrov, gjatë një takimi me presidentin e atëhershëm serb, Tomislav Nikoliq, në rezidencën verore të Putinit në qytetin jugor të Soçit. Vuçiq, në atë kohë ministër i Mbrojtjes dhe zëvendëskryeministër i parë i Serbisë, ishte gjithashtu i pranishëm.
Gazetarët nuk arritën të gjenin ndonjë dëshmi të vendosjes së Iordanidit në Ambasadën e Rusisë në Bruksel gjatë qëndrimit të tij të shkurtër atje, në një kontrast të fortë me kohën e tij në OSBE në Bosnjë e Hercegovinë, ku ai jepte intervista të shpeshta dhe bënte paraqitje publike.
Ndër 19 diplomatët e tjerë rusë në listën e inteligjencës belge për spiunët e dyshuar, përveç Iordanidit, ishte Aleksandr Kovalchuk, i cili shërbente zyrtarisht si këshilltar në Ambasadën ruse në Bruksel.
Ndërkohë, një nga diplomatët e dëbuar, Sergei Gudilin, kishte fotografuar një objekt ushtarak pranë kryeqytetit belg, sipas të dhënave të disponueshme publikisht në llogarinë e tij në aplikacionin e fitnesit Strava.
Në korrik të vitit 2021, ai postoi një fotografi në llogarinë e tij Strava të stacionit të radarëve në Bertem, pjesë e rrjetit të kontrollit të trafikut ajror të Belgjikës, i cili ofron të dhëna radarike për ushtrinë belge.
Pyetjet e dërguara në adresat e listuara të postës elektronike për Kovalchukun, Cherepanovin, Zamogilnykhin dhe Gudilin mbetën pa përgjigje.
Sipas listës, spastrimet e Belgjikës çuan në dëbimin e gjithsej 20 spiunëve të dyshuar rusë, duke shtuar edhe 48 dëbime të mëparshme të anëtarëve të delegacioneve ruse në BE dhe NATO.
“Belgjika dëshiron të mbajë marrëdhënie normale diplomatike me Rusinë, por nuk mund të lejojë që këto marrëdhënie të keqpërdoren për qëllime spiunazhi”, tha zëdhënësi i Ministrisë së Jashtme Belge, Pierre Steverlynck.
Kërcënimet në zhvillim
Appathurai tha se Rusia është zhvendosur drejt rekrutimit në internet, duke angazhuar gjithnjë e më shumë banda kriminale dhe individë të pavetëdijshëm për akte sabotazhi.
Revista gjermane Der Spiegel raportoi muajin e kaluar se hetuesit gjermanë dyshojnë se një valë incidentesh vandalizmi ndaj makinave në vend është financuar nga një klient rus dhe është kryer nga bashkëpunëtorë të nivelit të ulët nën maskën e aktivizmit për klimën.
Prokurorët në qytetin jugor gjerman të Ulmit thanë se katër të dyshuar ishin ndaluar në lidhje me më shumë se 100 raste vandalizmi, ku ishte përdorur shkumë e fortë për të bllokuar gypat e shkarkimit të makinave. Të dyshuarit përfshinin shtetas nga Rumania, Serbia dhe Bosnja.
“Nuk do të hyj në detaje, mund të konfirmoj vetëm vlefshmërinë e frikës se Rusia po planifikonte akte terrori ajror, jo vetëm kundër Polonisë, por edhe kundër linjave ajrore në mbarë botën”, tha Tusk në një konferencë për shtyp.
Moska ka mohuar në mënyrë të përsëritur akuzat nga qeveritë perëndimore për përfshirjen e saj në sulme terroriste, përfshirë zjarrvënie, helmime dhe sulme ndaj individëve në Perëndim./REL
