11 ditë larg ndeshjes së parë kualifikuese të Botërorit kundër Anglisë në Uembli, Shqipëria duhet të shqetësohet për mungesën e alternativave në majë të sulmit. Ky është një shqetësim serioz për trajnerin Silvinjo, i cili në këtë moment ka të gatshëm vetëm dy lojtarë që mund të luajnë në qendër të repartit ofensiv, Daku dhe Uzuni, edhe ata jo në top formë. Armando Broja, i cili pas Europianit nuk ka luajtur më fare thuajse, do të mungojë edhe ndaj tre luanëve në mitikun Uembli. Aventura e tij tek Everton ka shkuar shumë keq me dëmtime të njëpasnjëshme dhe stafi mjekësor i Everton ka konfirmuar se Broja nuk është ende gati për minuta në fushë, ndonëse është kthyer në stërvitje. Indrit Tuci, që luajti në duelet e Ligës së Kombeve, gjithashtu ka probleme fizike.
Një problem tjetër që shton hallet e Silvinjos mban emrin Rey Manaj. Lushnjari humbi për pak çaste ndjenjat pas një përplasjeje të fortë kokë më kokë me një kundërshtar në duelin e Superligës turke mes Sivaspor dhe Gëztepe, që në fillim të sfidës, kur goditi traversën. Manaj u dërgua me urgjencë në spital, aty ku reagimet ishin inkurajuese mbi shëndetin e tij. Sulmuesi kuqezi madje i pyeti mjekët nëse mund të jetë që nga java e ardhshme në fushë me Sivaspor, edhe pse ai duhet të jetë nën monitorim dhe situata e Manaj duhet të vlerësohet me kujdes në lidhje me grumbullimin e mundshëm në kombëtare.
Në këto kushte, zgjidhja e detyruar në majë të sulmit është Mirlind Daku, i cili së fundmi në kampionatin rus shënoi dy gola me peshë në duelin e skuadrës së tij Rubin Kazan kundër Spartak Moske, por në fund humbi toruan kur u nxor jashtë me të kuq, duke tentuar të sulmojë gjyqtarin. Myrto Uzuni ka vetëm pak ditë që stërvitet me klubin e ri, Ostin, në SHBA, teksa vjen nga një kohë e gjatë pa stërvitje të rregullt dhe pa minuta në lojë.
Në këto kushte, zgjedhjet e Silvinjos ngushtohen shumë, përjashto surprizat e mundshme në listën përfundimtare. Anglia më 21 mars në Londër dhe Andora 3 ditë më vonë në Tiranë, po afrojnë, dhe kurioziteti për të kuptuar listën dhe alternativat e Silvinjos për këto dy ndeshje mbetet i madh, në kushtet kur dëmtimet janë të konsiderueshme.
