Tottenham pësoi një humbje të bujshme në Europa League, duke u rrëzuar në fushën e AZ Alkmaar pas një autogoli të Bergvall. Një mbrëmje për t’u harruar sa më shpejt, por që u bë edhe më e hidhur nga përplasja në distancë mes tifozëve dhe Guglielmo Vicario, një prej më të mirëve në fushë për Spurs. Në fund të ndeshjes, tensioni ishte në maksimum dhe një gjest i portierit italian ndezi menjëherë kaosin.
Gjithçka ndodhi menjëherë pas fishkëllimës së fundit, kur Vicario u afrua te sektori i tifozëve anglezë për t’u kërkuar mbështetje. Ai e bëri këtë me gjeste të mëdha dhe një shprehje nervoze në fytyrë, që nxiti reagime të përziera si nga tifozët në stadium, ashtu edhe nga ata në shtëpi, të cilët e kritikuan ashpër.
Çfarë ndodhi mes Vicario e tifozëve të Tottenham?
Ishte një mbrëmje për t’u harruar për Tottenham-in, që tashmë rrezikon eliminimin që në 1/8-at e Europa League. AZ Alkmaar siguroi një fitore të rëndësishme në shtëpi, falë autogolit të Spurs, të cilët do të duhet të japin maksimumin në ndeshjen e kthimit për të mbajtur gjallë shpresat europiane. Por ndërkohë, ata duhet të riparojnë edhe çarjen që është krijuar me tifozët, për shkak të gjestit të portierit Vicario.
Italiani ishte një nga më të mirët në fushë dhe me pritjet e tij mbajti gjallë ekipin e Postecoglu, por kjo nuk mjaftoi për të fituar miratimin e tifozëve. Pas përfundimit të ndeshjes, Vicario shkoi drejt sektorit të tifozëve mysafirë, duke kërkuar duartrokitje dhe duke i nxitur ata të mbështesin ekipin edhe në humbje. Por ky gjest u prit keq nga shumë tifozë, të cilët e konsideruan të papërshtatshëm, duke pasur parasysh zhgënjimin e madh të sezonit dhe sakrificat që ata bëjnë për të ndjekur ekipin në çdo transfertë.
Lexo më tej: Gafa e Mbretit Charles me Son për situatën e Tottenham: e vë në siklet me një pyetje
Si rezultat, tifozët shkarkuan zemërimin e tyre ndaj italianit Vicario, i cili nga ana e tij u largua nga fusha me disa gjeste të dukshme pakënaqësie. Kritikat nuk munguan as në rrjetet sociale, ku shumë tifozë nuk e panë me sy të mirë sjelljen e tij, veçanërisht duke marrë parasysh faktin që Tottenham nuk dha asnjë arsye në fushë për të nxitur një reagim pozitiv nga tifozët e tij.
