Hamasi ka dorëzuar trupat e katër pengjeve izraelite të mbajtur në Gaza, si pjesë e një shkëmbimi me qindra të burgosur palestinezë. Trupat e dorëzuara pretendohet se i përkasin Shlomo Mansour (86 vjeç), Ohad Yahalomi (50 vjeç), Tsachi Idan (50 vjeç) dhe Itzik Elgarat (69 vjeç), të cilët u rrëmbyen nga Hamasi gjatë sulmeve të 7 tetorit 2023.
Në këmbim, Izraeli ka liruar më shumë se 600 të burgosur palestinezë, të cilët janë pritur me festime si në Bregun Perëndimor ashtu edhe në Gaza. Ky shkëmbim është pjesë e fazës së parë të marrëveshjes së armëpushimit, e cila pritet të përfundojë të shtunën.
Dorëzimi i fundit vjen pas një incidenti të javës së kaluar, ku Hamasi gabimisht dorëzoi trupin e një gruaje palestineze në vend të Shiri Bibas, një peng izraelite, duke shkaktuar zemërim në Izrael. Hamasi e pranoi gabimin dhe më vonë dorëzoi trupin e Bibas.
Izraeli ka akuzuar Hamasin për përdorimin e ceremonive të dorëzimit si “akte poshtëruese” dhe për trajtim mizor të pengjeve gjatë shkëmbimeve. Pavarësisht tensioneve, marrëveshja për shkëmbimin e pengjeve dhe të burgosurve është konsideruar një hap i rëndësishëm drejt zgjatjes së armëpushimit mes dy palëve.
