Ademola Lookman u rikthye të luajë për Atalantën në momentin më delikat të sezonit. Nigeriani u fut në lojë në pjesën e dytë të ndeshjes kundër Bruges, dhe pas vetëm 30 sekondash shënoi, duke i dhënë skuadrës shpresën për një rikthim të madh. Por pak më vonë, ai humbi një penallti, një gabim që vulosi eliminimin e Atalantës. Pas ndeshjes, trajneri Gian Piero Gasperini e kritikoi ashpër duke thënë se ishte “një nga goditësit më të këqij të penalltive” që kishte parë ndonjëherë. Kjo deklaratë nxiti reagime të shumta në rrjetet sociale, me tifozë që e sulmuan rëndë Lookman. Përgjigjja e tij nuk vonoi dhe ai vendosi të fliste përmes një postimi të gjatë në rrjetet sociale.
Lookman humbet penalltinë, Gasperini e kritikon
Sulmuesi sapo ishte rikuperuar nga një dëmtim dhe e nisi ndeshjen nga stoli kundër Bruges. Në momentin kur rezultati ishte 0-3, ai u fut në fushë dhe shënoi menjëherë. Megjithatë, më vonë humbi një penallti vendimtare, dhe me atë gabim u shuan shpresat për kualifikim. Në përfundim të ndeshjes, Gasperini u shpreh hapur kundër tij: “Është një nga goditësit më të dobët të penalltive që kam parë ndonjëherë.”
Reagimi i Lookman në rrjetet sociale
Fjalët e trajnerit, bashkë me kritikat e ashpra të tifozëve, e goditën rëndë Lookmanin, i cili vendosi të reagojë në platformën X (ish-Twitter): “Më trishton që jam i detyruar të bëj këtë deklaratë në një ditë si kjo, sidomos pas asaj që kemi arritur së bashku si skuadër dhe si qytet. Të jem shënjestruar në këtë mënyrë jo vetëm që më lëndon, por e konsideroj edhe një mungesë të thellë respekti – jo më pak për shkak të punës së palodhur dhe përkushtimit të madh që gjithmonë jap për ta ndihmuar këtë klub dhe tifozët e jashtëzakonshëm të Bergamos.”
Lookman shpjegon pse ai e goditi penalltinë në Champions
Në të njëjtin postim, Lookman theksoi se kishte kaluar momente të vështira te Atalanta, por kishte zgjedhur të mos fliste për to, pasi gjithmonë e kishte vënë skuadrën në plan të parë. “E vërteta është se gjatë kohës sime këtu kam kaluar shumë sfida të vështira, për të cilat nuk kam folur kurrë sepse besoj se skuadra duhet gjithmonë të mbrohet dhe të vijë para gjithçkaje. Kjo e bën atë që ndodhi mbrëmë edhe më të dhimbshme. Ashtu si tifozët tanë të jashtëzakonshëm, edhe ne si skuadër po vuajmë për rezultatin e mbrëmshëm.”
Por mbi të gjitha, Lookman sqaroi polemikën mbi penalltinë e humbur: “Gjatë ndeshjes, lojtari i caktuar për të gjuajtur penalltitë më dha topin dhe më kërkoi ta godisja unë. Për të ndihmuar skuadrën, mora përgjegjësinë dhe e bëra atë në atë moment. Jeta është plot sfida dhe transformimi i dhimbjes në forcë është diçka që do të vazhdoj të bëj.”
— Ademola Lookman (@Alookman_) February 19, 2025
