Kancelari gjerman Olaf Scholz ka këmbëngulur se negociatat me Rusinë duhet të respektojnë “pavarësinë sovrane” të Ukrainës.
Kancelari gjerman theksoi se për këtë përpjekje do të nevojitet mbështetja e partnerëve evropianë dhe transatlantikë.
Ai paralajmëroi se një fitore për Rusinë ose rënia e Ukrainës nuk do të krijonte paqe. Ai tha gjithashtu se një paqe e diktuar nuk do të merrte kurrë mbështetjen e Gjermanisë.
“Ne gjithashtu nuk do të pajtohemi me asnjë zgjidhje që çon në një shkëputje të sigurisë evropiane dhe amerikane”, tha Scholz.
Scholz akuzoi Rusinë se tashmë e ka përshkallëzuar situatën me veprime të rrezikshme kundër shteteve në aleancën transatlantike.
Kancelari gjerman përmendi sabotimin e kabllove nënujore dhe infrastrukturës tjetër, sulmet me zjarrvënie, dezinformimin dhe përpjekjet për të manipuluar zgjedhjet demokratike.
