Pas gjashtë muajsh, polemika rreth ndeshjes në Paris 2024 mes Angela Carini dhe Imane Khelif rikthehet sërish në qendër të vëmendjes. Këtë herë, çështja që ka trazuar jo vetëm botën e boksit, por edhe gjithë sportin dhe opinionin publik, është riaktivizuar nga luftëtarja e njohur italiane e MMA-së, Micol Di Segni. Ajo e ka prekur këtë temë gjatë një podcasti të dedikuar sportistëve italianë, duke bërë një koment të drejtpërdrejtë dhe mjaft të ashpër: “Hidhet në tokë për dy goditje? Ka ndjerë aromën e ndonjë programi… pastaj edhe këshillat e gabuara…”. Reagimi i Carinit nuk ka vonuar: “Vetëm urrejtje dhe frustrim, shpifni vetëm për pak famë”.
Di Segni sulmon boksieren Carini për duelin me Khelif
Një polemikë e re dhe e zjarrtë është përhapur me shpejtësi në internet pas një podcasti që ka ngjallur reagime të shumta dhe ka sjellë përplasje të reja mbi një çështje që kurrë nuk u mbyll plotësisht. Çështja ka ndarë opinionin publik dhe sportiv në dy kampe, duke mos lënë asnjë hapësirë për pajtim: ndeshja e 1 gushtit 2024 në Lojërat Olimpike të Parisit mes Imane Khelif dhe Angela Carinit, ku boksierja italiane vendosi të tërhiqej pas goditjeve të para. Një vendim që ndezi polemika të ashpra, sidomos kur Khelif vazhdoi garën dhe përfundoi duke fituar medaljen e artë në boksin femëror.
“Këshilla të gabuara dhe aroma e spektakleve televizive… rrëzohesh për dy grushta?”
Më 5 shkurt, gjatë podcastit ‘Most Valuable Podcast’, i cili ndiqet nga shumë sportdashës dhe profesionistë, ishte e ftuar luftëtarja e MMA-së Micol Di Segni, e cila është gjithashtu kampione e botës në IMMAF. Gjatë bisedës, ajo dha mendimin e saj për atë që ndodhi në Paris: “Imane Khelif stërvitet në Assisi me kombëtaren e boksit. Carini ishte stërvitur me të më parë, të gjitha vajzat ishin stërvitur me të, madje kishin bërë dush bashkë. E dinin shumë mirë nëse ishte grua apo burrë…” – tha Di Segni, duke nisur një koment thumbues që vazhdoi me ironi të theksuar: “Në kategorinë 66 kg do të thotë se gjatë gjithë jetës ke bërë sparring me burra. Pastaj shkon në Olimpiadë dhe rrëzohesh për dy goditje?”.
Reagimi i Carini: “Vetëm shpifje të mbushura me urrejtje”
Pyetja retorike e Di Segnit gjeti përgjigje në vijim, teksa ajo shtoi edhe më shumë benzinë në zjarr: “Sigurisht që një grusht nga një burrë është ndryshe nga ai i një gruaje. Një goditje nga dikush 60 kg bën më shumë dëm sesa nga një vajzë. Por nëse ke stërvitur me burra dhe me vetë Khelif, atëherë pse? Sepse ke marrë këshilla të gabuara, ke ndjerë aromën e ndonjë programi televiziv, ndoshta të Barbara D’Urso…”
Di Segni përmbyll debatin: “Gati, kur dhe ku të duash”
Deklaratat e saj të forta bënë që Angela Carini të thyente heshtjen dhe të reagonte ashpër: “Ju shtyn vetëm urrejtja dhe frustrimi” – komentoi ajo, duke iu përgjigjur edhe ndjekësve që e pyetën për situatën. “Viktimë? Jo, kurrë nuk do të jem. Por nuk mund të qëndroj e heshtur përballë gënjeshtrave të përhapura vetëm për pak famë. Ju lejuat dikë të më tallej”. Si kundërpërgjigje, Di Segni e mbylli debatin me një sfidë të hapur ndaj Carinit: “Nuk ka gënjeshtra. Jam gati për përballje, kur dhe ku të duash”.
