Finalja e Carabao Cup do të jetë mes Liverpool dhe Newcastle. “The Reds” kishin humbur ndeshjen e parë 1-0 ndaj Tottenham, por në Anfield zhvilluan një paraqitje madhështore, duke shkatërruar kundërshtarin me një fitore të pastër 4-0. Në pjesën e parë, një gol i Szoboszlai u anulua, ndërsa Gakpo (34’) i dha epërsinë vendasve. Pjesa e dytë ishte një spektakël i vërtetë, me Salah (51’), Szoboszlai (75’) dhe Van Dijk (80’) që vulosën triumfin e thellë të Liverpool.
Liverpool, mjeshtër i përmbysjeve, turpërohet Tottenham
Në Anfield u përballën dy skuadra me gjendje shpirtërore të kundërta dhe Liverpool e tregoi edhe një herë se është mjeshtër i përmbysjeve. Pas disfatës 1-0 në Londër, ekipi i Slot e dominoi plotësisht ndeshjen, duke mos i dhënë asnjë shans Tottenham, që u duk i dorëzuar. Me një kontroll absolut të lojës, “The Reds” e mbyllën pjesën e parë me 72% zotërim të topit. Salah testoi fillimisht refleksin e portierit Kinsky, më pas ishte radha e Gakpo. Në minutën e 30-të, Szoboszlai e çoi topin në rrjetë, por goli u anulua. Tre minuta më vonë, Liverpool gjeti avantazhin: një krosim nga Salah kaloi mes dy lojtarëve të tij, por në shtyllën e dytë ishte Gakpo, i cili nuk fali.
Tottenham shembet, Liverpool nuk ndalet
Për Tottenham, situata u bë edhe më e vështirë në një Anfield të zjarrtë. Richarlison u dëmtua, Tel hyri në vend të tij, por skuadra e Postecoglou u shua plotësisht. Kinsky fillimisht shpëtoi skuadrën, por më pas gaboi rëndë, duke shkaktuar një penallti për faullin ndaj Darwin Nunez. Salah nuk gaboi nga pika e bardhë dhe dyfishoi avantazhin në minutën e 51′. Postecoglou u përpoq të reagonte me ndryshime në mesfushë, por Tottenhami nuk u përgjigj. Liverpooli vazhdoi të dominojë dhe në minutën e 75′, pas një traversë të Gravenberch, Szoboszlai e dërgoi rezultatin në 3-0 me një goditje të bukur para Kop. Pesë minuta më vonë, Van Dijk realizoi golin e katërt me një goditje me kokë, ndërsa Jota humbi një rast tjetër të pastër.
Lexo më tej: Video/ Isak e Gordon shembin Arsenal: Newcastle sheh finalen e Carabao Cup
Liverpool dhuroi një performancë fantastike dhe me këtë fitore 4-0 siguroi finalen e Carabao Cup, ku do të sfidojë Newcastle. Ndërkohë, për Tottenham ishte një tjetër mbrëmje katastrofike, dhe tashmë Postecoglou rrezikon seriozisht të gjendet nën presion.
