Elon Musk bëri një paraqitje virtuale në një miting të partisë së ekstremit të djathtë Alternativa për Gjermaninë të shtunën, duke përsëritur mbështetjen e tij përpara zgjedhjeve të 23 shkurtit në vend dhe duke i thënë turmës se është koha për të “lëvizur” nga “faji i së kaluarës“.
CEO i Tesla-s iu drejtua turmës së bashku me lideren e partisë Alice Weidel, duke thënë se partia është “shpresa më e mirë për Gjermaninë” dhe bëri thirrje për “ruajtjen e kulturës gjermane” dhe “mbrojtjen e popullit gjerman”.
“Fëmijët nuk duhet të jenë fajtorë për mëkatet e prindërve të tyre, e lëre më stërgjyshërit e tyre”, tha Musk, duke iu referuar historisë së vendit me partinë naziste.
“Është mirë të jesh krenar për kulturën gjermane, vlerat gjermane dhe të mos e humbësh atë në një lloj multikulturalizmi që hollon gjithçka”, shtoi Musk, duke u brohoritur nga turma e rreth 4,500 njerëzve.
Donald Tusk, kryeministri i Polonisë, tha se fjalimi i Musk i tingëllonte ogurzi.
“Fjalët që dëgjuam nga aktorët kryesorë të tubimit të AfD-së për ‘Gjermaninë e Madhe’ dhe ‘nevoja për të harruar fajin gjerman për krimet naziste’ dukeshin shumë të njohura dhe ogurzeza. Sidomos vetëm disa orë para përvjetorit të çlirimit të Aushvicit”, shkroi Tusk.
Mbështetja fillestare e Musk për AfD-në muajin e kaluar tërhoqi qortime të forta, duke përfshirë edhe kancelarin gjerman Olaf Scholz, i cili tha se mbështetja e miliarderit të teknologjisë për të djathtën ekstreme “rrezikon” demokracinë europiane. Musk kohët e fundit ka hedhur mbështetjen e tij pas liderëve të shumtë europianë të ekstremit të djathtë, duke përfshirë kryeministren italiane Giorgia Meloni dhe kreun e Partisë Reforma në Mbretërinë e Bashkuar, Nigel Farage (megjithëse ai më pas e ktheu kundër Farage, duke thënë se ai “nuk e ka atë që duhet”).
Sipërmarrësi miliarderi shpenzoi gjithashtu mbi një çerek miliardë dollarë për të zgjedhur Donald Trumpin president dhe u shpërblye me një pozicion me ndikim që drejton Departamentin e ri të Efikasitetit të Qeverisë.
Musk, një këshilltar i ngushtë i presidentit, bëri bujë të hënën gjatë festimeve të inaugurimit të Trump, pasi bëri një përshëndetje me krahë të hapur që kritikët shpejt e krahasuan me përshëndetjen naziste “Sieg Heil”.
Por Musk i hodhi poshtë krahasimet, duke thënë fillimisht se “të majtët radikalë janë vërtet të mërzitur që u duhej të kalonin kohë nga dita e tyre e zënë duke lavdëruar Hamasin për të më quajtur mua nazist”, dhe më pas vazhdoi të postonte një seri lojërash me temë naziste.
Në fillim të këtij muaji, Musk dhe Weidel, e cila kandidon për kancelare, zhvilluan një bisedë në platformën X të Musk, duke mbuluar tema që variojnë nga “marsianët e ardhshëm” te Zoti, dhe Adolf Hitleri. Gjatë bisedës së tyre, Musk i kërkoi Weidel t’i përgjigjet pretendimeve se AfD është e lidhur me partinë naziste të Hitlerit. Kandidatja për kancelare u përgjigj duke e quajtur liderin nazist një “djalë socialist komunist” dhe duke argumentuar se AfD është “pikërisht e kundërta”.
Të shtunën, Weidel falënderoi Musk për mbështetjen e tij, duke shtuar: “Bëni Gjermaninë përsëri të madhe!”
Politico, përshtati në shqip
